โย ปเนตฺถ จ วตฺตพฺโพ, ปาฬิมุตฺตวินิจฺฉโย;
ตํ มยํ ปรโตเยว, ภณิสฺสาม ปกิณฺณเกฯ
[240]
ปราชิตาเนกมเลน วุตฺตํ;
ปาราชิกํ ยํ ทุติยํ ชิเนน;
วุตฺโต สมาเสน มยสฺส จตฺโถ;
วตฺตุํ อเสเสน หิ โก สมตฺโถฯ
อิติ วินยวินิจฺฉเย ทุติยปาราชิกกถา นิฏฺฐิตาฯ
ตติยปาราชิกกถา
[241]
มนุสฺสชาติํ ชานนฺโต, ชีวิตา โย วิโยชเย;
นิกฺขิเปยฺยสฺส สตฺถํ วา, วเทยฺย มรเณ คุณํฯ
[242]
เทเสยฺย มรณูปายํ, โหตายมฺปิ ปราชิโต;
อสนฺเธยฺโยว โส เญยฺโย, ทฺเวธา ภินฺนสิลา วิยฯ
[243]
วุตฺตา ปาณาติปาตสฺส, ปโยคา ฉ มเหสินา;
สาหตฺถิโก ตถาณตฺติ-นิสฺสคฺคิถาวราทโยฯ
[244]
ตตฺถ กาเยน วา กาย-ปฏิพทฺเธน วา สยํ;
มาเรนฺตสฺส ปรํ ฆาโต, อยํ สาหตฺถิโก มโตฯ
[245]
‘‘เอวํ ตฺวํ ปหริตฺวา ตํ, มาเรหี’’ติ จ ภิกฺขุโน;
ปรสฺสาณาปนํ นาม, อยมาณตฺติโก นโยฯ
[246]
ทูรํ มาเรตุกามสฺส, อุสุอาทินิปาตนํ;
กาเยน ปฏิพทฺเธน, อยํ นิสฺสคฺคิโย วิธิฯ
[247]
อสญฺจาริมุปาเยน, มารณตฺถํ ปรสฺส จ;
โอปาตาทิวิธานํ ตุ, ปโยโค ถาวโร อยํฯ
[248]
ปรํ มาเรตุกามสฺส, วิชฺชาย ชปฺปนํ ปน;
อยํ วิชฺชามโย นาม, ปโยโค ปญฺจโม มโตฯ
[249]
สมตฺถา มารเณ ยา จ, อิทฺธิ กมฺมวิปากชา;
อยมิทฺธิมโย นาม, ปโยโค สมุทีริโตฯ
[250]
เอเกโก ทุวิโธ ตตฺถ, โหตีติ ปริทีปิโต;
อุทฺเทโสปิ อนุทฺเทโส, เภโท เตสมยํ ปนฯ
[251]
พหุสฺวปิ ยมุทฺทิสฺส, ปหารํ เทติ เจ ปน;
มรเณน จ ตสฺเสว, กมฺมุนา เตน พชฺฌติฯ
[252]
อนุทฺทิสฺส ปหาเรปิ, ยสฺส กสฺสจิ เทหิโน;
ปหารปฺปจฺจยา ตสฺส, มรณํ เจ ปราชโยฯ
[253]
มเต ปหฏมตฺเต วา, ปจฺฉา มุภยถาปิ จ;
หนฺตา ปหฏมตฺตสฺมิํ, กมฺมุนา เตน พชฺฌติฯ
[254]
เอวํ สาหตฺถิโก เญยฺโย, ตถา อาณตฺติโกปิ จ;
เอตฺตาวตา สมาเสน, ทฺเว ปโยคา หิ ทสฺสิตาฯ
[255]
วตฺถุ กาโล จ เทโส จ, สตฺถญฺจ อิริยาปโถ;
กรณสฺส วิเสโสติ, ฉ อาณตฺตินิยามกาฯ
[256]
มาเรตพฺโพ หิ โย ตตฺถ, โส ‘‘วตฺถู’’ติ ปวุจฺจติ;
ปุพฺพณฺหาทิ สิยา กาโล, สตฺตานํ โยพฺพนาทิ จฯ
[257]
เทโส คามาทิ วิญฺเญยฺโย, สตฺถํ ตํ สตฺตมารณํ;
มาเรตพฺพสฺส สตฺตสฺส, นิสชฺชาทิริยาปโถฯ
[258]
วิชฺฌนํ เภทนญฺจาปิ, เฉทนํ ตาฬนมฺปิ วา;
เอวมาทิวิโธเนโก, วิเสโส กรณสฺส ตุฯ
[259]
‘‘ยํ มาเรหี’’ติ อาณตฺโต, อญฺญํ มาเรติ เจ ตโต;
‘‘ปุรโต ปหริตฺวาน, มาเรหี’’ติ จ ภาสิโตฯ
[260]
ปจฺฉโต ปสฺสโต วาปิ, ปหริตฺวาน มาริเต;
วตฺถาณตฺติ วิสงฺเกตา, มูลฏฺโฐ ปน มุจฺจติฯ
[261]
วตฺถุํ ตํ อวิรชฺฌิตฺวา, ยถาณตฺติญฺจ มาริเต;
อุภเยสํ ยถากาลํ, กมฺมพทฺโธ อุทีริโตฯ
[262]
อาณตฺโต ‘‘อชฺช ปุพฺพณฺเห, มาเรหี’’ติ จ โย ปน;
โส เจ มาเรติ สายนฺเห, มูลฏฺโฐ ปริมุจฺจติฯ
[263]
อาณตฺตสฺเสว โส วุตฺโต;
กมฺมพทฺโธ มเหสินา;
กาลสฺส หิ วิสงฺเกตา;
โทโส นาณาปกสฺส โสฯ
[264]
‘‘อชฺช มาเรหิ ปุพฺพณฺเห, สฺเววา’’ติ อนิยามิเต;
ยทา กทาจิ ปุพฺพณฺเห, วิสงฺเกโต น มาริเตฯ
[265]
เอเตเนว อุปาเยน, กาลเภเทสุ สพฺพโส;
สงฺเกโต จ วิสงฺเกโต, เวทิตพฺโพ วิภาวินาฯ
[266]
‘‘อิมํ คาเม ฐิตํ เวริํ, มาเรหี’’ติ จ ภาสิโต;
สเจ โส ปน มาเรติ, ฐิตํ ตํ ยตฺถ กตฺถจิฯ
[267]
นตฺถิ ตสฺส วิสงฺเกโต, อุโภ พชฺฌนฺติ กมฺมุนา;
‘‘คาเมเยวา’’ติ อาณตฺโต, วเน วา สาวธารณํฯ
[268]
‘‘วเนเยวา’’ติ วา วุตฺโต, คาเม มาเรติ เจปิ วา;
วิสงฺเกโต วิญฺญาตพฺโพ, มูลฏฺโฐ ปริมุจฺจติฯ
[269]
เอเตเนว อุปาเยน, สพฺพเทเสสุ เภทโต;
สงฺเกโต จ วิสงฺเกโต, เวทิตพฺโพว วิญฺญุนาฯ
[270]
‘‘สตฺเถน ปน มาเรหิ, อาณตฺโต’’ติ จ เกนจิ;
เยน เกนจิ สตฺเถน, วิสงฺเกโต น มาริเตฯ
[271]
‘‘อิมินา วาสินา หี’’ติ, วุตฺโต อญฺเญน วาสินา;
‘‘อิมสฺสาสิสฺส วาปิ ตฺวํ, ธาราเยตาย มารย’’ฯ
[272]
อิติ วุตฺโต สเจ เวริํ, ธาราย อิตราย วา;
ถรุนา วาปิ ตุณฺเฑน, วิสงฺเกโตว มาริเตฯ
[273]
เอเตเนว อุปาเยน, สพฺพาวุธกชาติสุ;
สงฺเกโต จ วิสงฺเกโต, เวทิตพฺโพ วิเสสโตฯ
[274]
‘‘คจฺฉนฺตเมนํ มาเรหิ’’, อิติ วุตฺโต ปเรน โส;
มาเรติ นํ นิสินฺนํ เจ, วิสงฺเกโต น วิชฺชติฯ
[275]
‘‘นิสินฺนํเยว มาเรหิ’’, ‘‘คจฺฉนฺตํเยว วา’’ติ จ;
วุตฺโต มาเรติ คจฺฉนฺตํ, นิสินฺนํ วา ยถากฺกมํฯ
[276]
วิสงฺเกตนฺติ ญาตพฺพํ, ภิกฺขุนา วินยญฺญุนา;
เอเสว จ นโย เญยฺโย, สพฺพิริยาปเถสุ จฯ
[277]
‘‘มาเรหี’’ติ จ วิชฺฌิตฺวา, อาณตฺโต หิ ปเรน โส;
วิชฺฌิตฺวาว ตมาเรติ, วิสงฺเกโต น วิชฺชติฯ
[278]
‘‘มาเรหี’’ติ จ วิชฺฌิตฺวา, อาณตฺโต หิ ปเรน โส;
ฉินฺทิตฺวา ยทิ มาเรติ, วิสงฺเกโตว โหติ โสฯ
[279]
เอเตเนว อุปาเยน, สพฺเพสุ กรเณสุปิ;
สงฺเกเต จ วิสงฺเกเต, เวทิตพฺโพ วินิจฺฉโยฯ
[280]
ทีฆํ รสฺสํ กิสํ ถูลํ, กาฬํ โอทาตเมว วา;
อาณตฺโต อนิยาเมตฺวา, มาเรหีติ จ เกนจิฯ
[281]
โสปิ ยํ กิญฺจิ อาณตฺโต, สเจ มาเรติ ตาทิสํ;
นตฺถิ ตตฺถ วิสงฺเกโต, อุภินฺนมฺปิ ปราชโยฯ
[282]
มนุสฺสํ กิญฺจิ อุทฺทิสฺส, สเจ ขณติวาฏกํ;
ขณนฺตสฺส จ โอปาตํ, โหติ อาปตฺติ ทุกฺกฏํฯ
[283]
ทุกฺขสฺสุปฺปตฺติยา ตตฺถ, ตสฺส ถุลฺลจฺจยํ สิยา;
ปติตฺวา จ มเต ตสฺมิํ, ตสฺส ปาราชิกํ ภเวฯ
[284]
นิปติตฺวา ปนญฺญสฺมิํ, มเต โทโส น วิชฺชติ;
อนุทฺทิสฺสกโมปาโต, ขโต โหติ สเจ ปนฯ
[285]
‘‘ปติตฺวา เอตฺถ โย โกจิ, มรตู’’ติ หิ ยตฺตกา;
มรนฺติ นิปติตฺวา เจ, โทสา โหนฺติสฺส ตตฺตกาฯ
[286]
อานนฺตริยวตฺถุสฺมิํ, อานนฺตริยกํ วเท;
ตถา ถุลฺลจฺจยาทีนํ, โหนฺติ ถุลฺลจฺจยาทโยฯ
[287]
ปติตฺวา คพฺภินี ตสฺมิํ, สคพฺภา เจ มริสฺสติ;
โหนฺติ ปาณาติปาตา ทฺเว, เอโกเวเกกธํสเนฯ
[288]
อนุพนฺเธตฺถ โจเรหิ, ปติตฺวา เจ มริสฺสติ;
โอปาตขณกสฺเสว, โหติ ปาราชิกํ กิรฯ
[289]
เวริโน ตตฺถ ปาเตตฺวา, สเจ มาเรนฺติ เวริโน;
ปติตํ ตตฺถ มาเรนฺติ, นีหริตฺวา สเจ พหิฯ
[290]
นิพฺพตฺติตฺวา หิ โอปาเต, มตา เจ โอปปาติกา;
อสกฺโกนฺตา จ นิกฺขนฺตุํ, สพฺพตฺถ จ ปราชโยฯ
[291]
ยกฺขาทโย ปนุทฺทิสฺส, ขณเน ทุกฺขสมฺภเว;
ทุกฺกฏํ มรเณ วตฺถุ-วสา ถุลฺลจฺจยาทโยฯ
[292]
มนุสฺเสเยว อุทฺทิสฺส, ขเต โอปาตเก ปน;
อนาปตฺติ ปติตฺวา หิ, ยกฺขาทีสุ มเตสุปิฯ
[293]
ตถา ยกฺขาทโย ปาเณ, ขเต อุทฺทิสฺส ภิกฺขุนา;
นิปติตฺวา มรนฺเตสุ, มนุสฺเสสุปฺยยํ นโยฯ
[294]
‘‘ปาณิโน เอตฺถ พชฺฌิตฺวา, มรนฺตู’’ติ อนุทฺทิสํ;
ปาสํ โอฑฺเฑติ โย ตตฺถ, สเจ พชฺฌนฺติ ปาณิโนฯ
[295]
หตฺถโต มุตฺตมตฺตสฺมิํ, ตสฺส ปาราชิกํ สิยา;
อานนฺตริยวตฺถุสฺมิํ, อานนฺตริยเมว จฯ
[296]
อุทฺทิสฺส หิ กเต ปาเส, ยํ ปนุทฺทิสฺส โอฑฺฑิโต;
พนฺธเนสุ ตทญฺเญสํ, อนาปตฺติ ปกาสิตาฯ
[297]
มูเลน วา มุธา วาปิ, ทินฺเน ปาเส ปรสฺส หิ;
มูลฏฺฐสฺเสว โหตีติ, กมฺมพทฺโธ นิยามิโตฯ
[298]
เยน ลทฺโธ สเจ โลปิ, ปาสมุคฺคฬิตมฺปิ วา;
ถิรํ วาปิ กโรเตวํ, อุภินฺนํ กมฺมพนฺธนํฯ
[299]
โย ปาสํ อุคฺคฬาเปตฺวา, ยาติ ปาปภยา สเจ;
ตํ ทิสฺวา ปุน อญฺโญปิ, สณฺฐเปติ หิ ตตฺถ จฯ
[300]
พทฺธา พทฺธา มรนฺติ เจ, มูลฏฺโฐ น จ มุจฺจติ;
ฐเปตฺวา คหิตฏฺฐาเน, ปาสยฏฺฐิํ วิมุจฺจติฯ
[301]
โคเปตฺวาปิ น โมกฺโข หิ, ปาสยฏฺฐิํ สยํกตํ;
ตมญฺโญ ปุน คณฺหิตฺวา, สณฺฐเปติ สเจ ปนฯ
[302]
ตปฺปจฺจยา มรนฺเตสุ, มูลฏฺโฐ น จ มุจฺจติ;
นาเสตฺวา สพฺพโส วา ตํ, ฌาเปตฺวา วา วิมุจฺจติฯ
[303]
โรเปนฺตสฺส จ สูลํ วา, สชฺเชนฺตสฺส อทูหลํ;
โอปาเตน จ ปาเสน, สทิโสว วินิจฺฉโยฯ
[304]
อนาปตฺติ อสญฺจิจฺจ, อชานนฺตสฺส ภิกฺขุโน;
ตถามรณจิตฺตสฺส, มเตปฺยุมฺมตฺตกาทิโนฯ
[305]
มนุสฺสปาณิมฺหิ จ ปาณสญฺญิตา;
สจสฺส จิตฺตํ มรณูปสํหิตํ;
อุปกฺกโม เตน จ ตสฺส นาโส;
ปญฺเจตฺถ องฺคานิ มนุสฺสฆาเตฯ
อิติ วินยวินิจฺฉเย ตติยปาราชิกกถา นิฏฺฐิตาฯ
จตุตฺถปาราชิกกถา
[306]
อสนฺตมตฺตสฺสิตเมว กตฺวา;
ภวํ อธิฏฺฐาย จ วตฺตมานํ;
อญฺญาปเทสญฺจ วินาธิมานํ;
ฌานาทิเภทํ สมุทาจเรยฺยฯ
[307]
กาเยน วาจายปิ วา ตทตฺเถ;
ญาเตว วิญฺญตฺติปเถ อภพฺโพ;
ยเถว ตาโล ปน มตฺถกสฺมิํ;
ฉินฺโน อภพฺโพ ปุน รุฬฺหิภาเวฯ
[308]
อสนฺตเมวตฺตนิ โย ปรสฺส;
ทีเปติ ฌานาทิมนนฺตรํ โส;
ชานาติ เจ โหติ จุโต หิ โน เจ;
ชานาติ ถุลฺลจฺจยมสฺส โหติฯ
[309]
‘‘โย เต วิหาเร วสตีธ ภิกฺขุ;
โส ฌานลาภี’’ติ จ ทีปิเต เจ;
ชานาติ ถุลฺลจฺจยมสฺส โน เจ;
ชานาติ ตํ ทุกฺกฏเมว โหติฯ
[310]
อสนฺตเมวตฺตนิ ธมฺมเมตํ;
อตฺถีติ กตฺวา วทโตธิมานา;
วุตฺโต อนาปตฺตินโย ปเนวํ;
อวตฺตุกามสฺส ตถาทิกสฺสฯ
[311]
ปาปิจฺฉตา ตสฺส อสนฺตภาโว;
อาโรจนญฺเจว มนุสฺสกสฺส;
นญฺญาปเทเสน ตเทว ญาณํ;
ปญฺเจตฺถ องฺคานิ วทนฺติ ธีราฯ
[312]
ปฐเม ทุติเย จนฺเต, ปริยาโย น วิชฺชติ;
ทุติเย ตติเยเยว, อาณตฺติ น ปเนตเรฯ
[313]